Eccu dunque u nostru blog.

L'aghju fattu stu blog pè testimonià d' una dimarchja originale, forse ùnica, di fà campà a lingua corsa.
L'aghju fattu dinò pè sparte è pè scambià cù tutti quelli chì, corsi o no, ricusanu a morte prugrammata di a nostra lingua.


Tuttu principiò a u mese d'aostu 2007 in muntagna (Rifugiu di Manganu- Monte Rotondu).
Dopu a una bella spassighjata di 7 ore u mo cumpagnu di marchja, Chì ghjè un amicu di zitellina, mi dice ch' ellu li piacerìa d'amparà a parlà corsu. Bell'affare!

• Prublemu maiò, un'campa micca in Corsica ma in u Var (Francia), è un' ha micca a pussibilità di sente parlà corsu ...
• Aiutu maiò, ha una voluntà tamanta d'amparà. (Ma què un'a sapia ancu)
  

Li prupongu subitu subitu d'esse u so "prufessore", è pè evità stu prublemu di luntananza, di fà st'amparera à u telèfonu, chjamendulu u più suvente pussìbule .
E ghjè ciò chè no femu dipoi quellu mese aostu, à u mìnimu una volta à a simana (ma suvente di più).
Oghje à Bruno, ghjè u so nome, li parlu solu corsu,(di ciò ch'ellu hà amparatu sicura) è capisce abbastanza bè.

Oghje Bruno principia à fà frase corte... A parlà corsu finalmente.